اخـوكـم ابـو سـالـي

الـتـرم الأول :

اخوكم ابوســالي .. شاب يافع أسـمـر اللون .. خجول المنظر حياوي المخبر في حاله عايش .. ماعنده من الشيطان طاري . حياته كلها ثلاث خانات :

المدرسة - غرفته - الاتحــاااد (شكلك نصراني ياالحبيب ماوراك مسجد انت ؟ )

وحيد امي وابوي ولي ثلاثة اخوان كلهم اكبر مني . ولا أحب العب معهم ولا اخالطهم واتجنبهم لأني أشك في نفسي لا جلست وياهم ..

- الكبير راعي حمام ..كل يوم مطلع بزران للسطح ويوريهم هالقطايف والغرانيق ويلعب معهم .. سطحنا صاير بالتوك اللهم عافنا .

والحمام والطيور لاحسات مخه وبعنف لدرجة مايتصورها المتصورون ولايتوقعها المتوقعون ولم يترقبها المتراقبون ..تصدقون مرة جيت من المدرسـة قلت له : السلام عليكم . قال وعليكم الحمام (( من جد رايح في رجلها الله يكون بعونه ))

- واللي اصغر منه عربجي وزاحف ولاهي في الطرب القديم وماغير طايح لي أغاني شعبيه وتجميع اغاني نادرة لفنانين شبعوا موت ومعطي هالدنيا بالخااامس ..

مرة سألته من تحب اكثر أمي ولا أبوي ؟ قال اممممممم بصراحه بصراحه بشير ثم عيسى !!! (( مخه منلحس من جد 1 ))

أحيان أقردن فيه: طيب البس ملابس جديده رح فصل لك ثياب كشخه تراك صاير وصخ..

يرد علي: رووووووووووووووووح ألعن ابو بليس الخكارا.. وش تبي اخوياي يقولون عني ؟ نظيف لا سمح الله !!

لا والمشكله وحده من درايش سيارته عليها صورة بشير شنان والغمارة الثانيه عليها لوحة : قاااطعوهم . عرضي دونك يارسول الله !!

-واللي أصغر منهم رومانسي بس بالغلط .. طايح لي تغزل و تشبيك مع الشغاله الاندونيسيه ومسوي لي في أمها قيس زمانه . يحبها . تصدقون أحيانا أدخل المطبخ ألقاه يغسل الصحون عنها (( اعنبو خيره ياهو فاهم التشبيك بالغلط ))

- وابوي وامي ماغير مطيحين عند الجزيرة ويتابعون الاخبار كأنهم بيحلون مشكلة الشرق الاوسط .. طيب الله لايهينكم حلوا مشكلة عيالكم هالشبهات !!
االمشكله ان ابوي يقدّر الاتجاه المعاكس وهو مايدري عنهم وش يقوولون .. بس يجوز له هواشهم ، وامي مع الوالد وماتدري وش الطبخه .. ذاك اليوم تصحيني من النوم تقول:

قم ياولدي رح مدرستك .. انجز قم ياوليدي خلك ديموقراطي !! ( أجرمت فيهم الجزيره لابارك الله فيها ))
--------------------(( الـتـرم الأول و ربـع ))
هاك اليوم .. اللي الله العالم انه كان خميس .. وان كاني مانيب واهم فهو كان غرة حزيران أول .. وأكيد كلكم تعرفون شهر حزيران هذا اللي من جهة شعبان شرق وانت رايحٍ تبي الصمان (( ورى ما توصف وجهك بعد؟ كل شي توصفه انت ؟ انهج علينا يالثور !! )
اييه .. جلست اافكر بوضعي .. حسيت بوحده .. وحشه . الفراغ يمزقني إربا إربا .. الخوف يلف المدينه والديكه تصيح في أعلى الغسق ..
الكل مظطرب ماعدا أنا .. نعم نعم انا .. مالي هكذا أبدو كالح الوجه منتفخ المناكب عظيم البراطم مطنقر البوز ؟ (( ويقولون لي ما أعرف أعبر ))
قعدت افكر في وضعي .. حسيت اني منبوذ في البيت. حسيت اني منيب ولد أهلي . حسيت انهم لاقيني عند باب مسجد وانا في المهاد ثم ربوني وتوهقوا بي يوم كبرت .. (( وش دعوه تحس ياغالي.. هذا الأكيد ))
قلت في نفسي: وش هالعيشه؟ شكل ضيقتي بسبب المعاصي ..يانفس يكفي يانفس توبي فان الموت قد حانا .. قالت: اقول انثبر يامال الضربه وشلون اتوب وانا في بيت يضم اخوانك .. انت شايف اخوانك الدشير السنلتح كيف؟ ابليس لو عاش معهم صار إمامهم ؟ علي الطلاق انه اعقل منهم .(( صادقة والله ))
وانا في غمرة تفكيري . . دخل أخوي راعي الطرب الشعبي.. قال بأسلوب شوارعي: حبتيييين ياابو تفكيير وش بك؟ احوووول وش يبي ذا .. ابد متضايق شوي؟ قال: خذ هذي زقارة حشيش على حسابي اكمخ والمره الجايه ترى تدفع!! .. قلت اقلب وجهك. هذا بدل ماتقول اخوي الصغير اخاف يدشر، تروح تخربه .. قال: يارووحي يا شباب2010 يا الخكاريه ياخي خل عنك كلام المدارس ومسلسلات قناة المستقله والخرط الفاضي، حشش بس ترى الدنيافانيه والنكهة تبقى ( ياشين العرابجه لا حاولوا يعبرون ) جيت أرد عليه ، دخل علينا اخوي الكبير راعي الحمام .. ناظر فيني ثم ناظر في اخوي المطرب ثم قال:
تشترون حمام ؟ ؟ قلت الله يلعنكم عاهات .. وطلعت وخليت لهم الغرفه .
نزلت عند امي متضايق قلت: يمه ليش حنا اسره غير مترابطه ؟ ليش مابيننا اخوه حقيقيه .. ليش كل واحد لاهي بحاله وبس ..
أين الترابط؟ اين التكافل؟ أين السلام. أين الوئام . فجأة نط علينا اخوي الكبير ثاني مرة وقال:
من اللي تو قال حمام ؟ تشترون ؟ طقيت راسي بالجدار وقلت بس اعنبو جدفكم كفايه حراام عليكم.. انا والله راح آخذ شقه واطلع عنكم .. حطمتوني الله يسامحكم ..
رحت فتحت الباب اباطلع ..وقبل ما اطلع سمعتُ صوتاَ رخيماَ يناديني واذا به ابي قائلا: أين ياولدي ؟ قلت رااحل يا أبي .. قال: صك الباب معك وانت طالع ( ألعن ابوالتحطيم بعد )
قعدوا يضحكون اخواني الدشير ويقولون لابوي:ياهوووه كفّك ياهوووه حلوووه الله يرجك .تحمس ابوي ورجمني بالنعله وهو يقول: مالت عليك يا الليبرالي.. ( اقول لكم لعبت فيه الجزيره ) واخواني قاموا يصفرون ويضحكون وراعي الطرب قعد يخرش عود بهالمناسبه واخوي الكبير يرقص وانا اتفرج واتحسر عليهم ,, طلعت وصكيت الباب وشغلت سيارتي ويوم جيت امشي لمحت اخوي اللي يحب شغالتنا جاي للبيت ومعه شريط "كسرات اندونيسيه" ناوي يقدمها هديه للشغاله .. بغيت ادعسه بس تعوذت بالله من بليس ومشيت (( أسرة منحله بقووة بأطرح مشكلتهم في العائلي ))
-------------------
(( الـتـرم الأول ونـص ))
طلعت بالسيارة وقعدت اهوجس بحزن .. وش هالعيشه .؟.. يلعن ام القهر .. طفش يابوســالي والله قهر .
وفي غمرة هواجيسي.. وقف فجأة بوجهي ليموزين في نص الشارع يبي يركب له واحد .. وانا اللي أكع فرامل سمعها اللي كاشت في صلبوخ ..عصبت والدم وصل الركب وتقدمت عند غمارة سواق الليموزين بألعن خامسه هواش ..فتحت الدريشه بأتفل في وجهه يوم دققت فيه لقيته باكستاني كبر سيارتي مرتين ..
وشنبه يدغدغ دركسون سيارته .. وعيونه حمراء تصلح هديه في عيد الحب ..
يوم شفت اوصافه كذا تذكرت سماحة الاسلام والمسلمين وقلت : وهـ سمااح (( بيني وبينكم وعلى بلاطه: مالها داعي تندبغ وانت طفشان ))
خليته.. وقعدت ادور ولا أدري وين أطس .. لمحت مقهى انتر نت .. النت مالي به معرفه الا اللهم التصفح ،خلف وامام والباقي من جنبها ,, قلت خلني أدخل المقهى واطقطق شوي يمكن يروح همي .. دخلت وخذت لي اشتراك ساعتين وجلست .. فتحت قوقل وكتبت بحث عن شات ..
طلع لي شات أحمر ومزبرق كأنه هوندا حقت خال وتصميمه حلو وفيه نجوم ، اسمه شات الحب الأبدي !! عاد اخوكم قروي لما شاف الشات يطلب منه اسم الدخول .. راح كاتب اسمه كامل وستر الله ماكتب رقم الهويه بعد
دخلت الشات.. لقيت فيه ناس ( ياشيخ قل قسم!! )) .. سلمت عليهم , الصراحه بعضهم طلع ذوق ورد علي السلام, وبعضهم ابن سته وستين كلب سحب علي ولا كأن فيه واحد اسمه ابوســالي قال السلام .. أعنبوا بليس لو اني بنت شرط ان ياخذوني باالاحضان ويسألوني عن الصحه والوالده والجيران ..بس بيني وبينكم فرحت اني لقيت على الاقل احد يرد علي سلامي لأني بالعاده في بيتنا أصلاَ مانعرف نسلم ولا نسأل عن بعض ..
قعدت اناظرهم واتفرج .. اضحك مرة ومرة اشارك .. واخوكم بطيء في الكتابه نسبياَ لأن آخر علمه بالكيبورد كان أيام معمل الحاسب في الثانوي .. وصار الواحد لا سألني في الشات سؤال وجيت ارد عليه أقعد أكح وأعاطس كأني منشغل عن الكيبورد وانا قاعد أكتب ، عشان لايقولون عني كل هذي كتابه ياالبطيء.. (( مقطعني الذكاء بسم الله حولي ))
جاز لي الشات .. ومادريت الا و انتهى اشتراك الساعتين . . خذت ساعتين اخرى .. وقعدت أدردش وكل شوي أتعرف على الشات اكثر.. وصرت أتجرأ وأسأل وأجاوب وأدردش .. وفكيت معهم ,.
وهنا بدأت الحكايه .. (( لاااه ؟ كان صبرت شوي بعد؟ آالله أبو كشرتك ))
اقتحمت الدردشه وحده اسمها نوف ! .. حاطه صورة أليسا .. وأخوكم من النوع اللي لا شاف اليسا خلاص يفصل عنده المخ ويصير ذكرى قديمه.محسوبكم من النوع اللي لا سمع بأليسا مايرده الا طواريء الشميسي.. حايستن مريره لا شافها على طول يفقد هويته ويبدأ يخربط ولاعاد يجمع .. نقطة ضعفي في هالعالم أليسااا يا والله اني خااقن معها وبقوووة (( منتب بلحالك .. أمة عريبيا اللي ماقد اتفقت .. اتفقت عليها ))
سلمت علينا نوف.. قالت: "هااااااااي كلكم من أول نك لآخر نك مساكم ورد" (( اعنبو بليس هالبنات مادري وين يجيبن هالكلام منه !!)) .. اخوكم بوســالي شاف الاسم نوف والصورة اليسا والخط لونه زهري تلخبطت فيوزاته وخقخق وداخ وبغى يستفرغ من زود الخشوع .. صار مثل اللي لا منه بغى يروح ماعاد يقدر يجي ولا حتى ربع بياله. ارجوك لاتحاول تقنعني !!! (( قلت لكم فيوزاته تلخبطت ماصدقتوني ))
كل الشات ردوا عليها السلام.. تصدقون حتى اللي طنشوني ردوا عليها !! .. الا انا طبعا مارديت لأني وقتها خاااااق وناسي اماكن الحروف..
كتبت نوف : وااو الأخ ابوســالي حيييل ثقل . . شدعوى رد السلام يا الغالي !!
نوف تكلمني !! نطقت اسمي !! .. نوف موجهه كلامها نحوي .. ياليت شعري ماذا أفعل .. حظنت الهندي اللي جاي يقول تبي شاهي وشك في نفسه المسكين !!
قامت اصابعي تلولش فوق الكيبورد وماتسمع الا طقطقه اصابعي وودي ارد ماعرفت وقمت انتفض ( من جد حرماان ) .. لدرجة ان اللي جنبي في المقهى جاني وقام يقرأ علي ويتفل ويقول:
بسم الله عليك وش بك يا أخ ؟ بردان نطفي المكيف ؟ قلت: لا ابد الله يسلمك ويجبر عزااكم مافيني شي.. ناظرني وقال:
عزااي هههههههه محشش أنت؟ ((معذور الأخ مايدري ان نوف كلمته وداخ بسببها ))
رجعت للشااشه وقعدت أدور رد على كلامها ..
قالت نوف: السلام سنه ورده واجب يا الثقيل
كتبت لها : مافيش شي يالاغيه (( يبي يكتب مافيه شي يا غاليه ومسكين متلخبط ))
كعتها نوف ضحك وقالت: ههههههههههههههههههههههههه ههههه علامك تخربط في الحروف ..
بيني وبينكم طاح وجهي وتفشلت ، قلت على بالي أصرفها : أبد والله بس هكرز حيوان لعب في كيبوردي قبل امس
وانفجروا ضحك اللي في الشات علي وماتت نوف ضحك وقعدت توزع الهاءات في الشاشه ..
الدلوخ يحسبونها ذبه مني أو اني خفيف دم .. وانا كنت جاد في تصريفتي !! اعنبوا شيطانكم وش عرفني بالهكر وسوالفه والله أني أول لا سمعتهم يقولون هكرز أحسبهم نوع من الشواذ اللي في أمريكا . .
قامت تسميني: راعي الهكرز .. وقمت اضحك معها بخبث واكتب :
ههههههههههههههههههههه خخخخخخخخخخ ككككككككك ررررررر (( الاخيره من جد مالها دخل ))
صرنا نسولف على خفيف..سألتها بكل ما أوتيت من شفاحه: نوف كم عمرك؟ .. قالت : كم تعطيني ؟ قلت: جوز حمام!! .. (( الله يرج اخوي الكبير واصل معي للشات ))
ضحكت علي وقالت : ياشباب وربي وربي ان ابوســالي هذا مررررررررة رووعه
هي قالت روعه ولا ماقالت .. رحت انا كاتب: أكيد الأروع وجودك .. (( من وين جيت ذي يالهيس؟ ))
قالت: يخليك ربي.. ومن هالكلام والمجاملات .. يوم شوي الا وشاشة النت تسكرت لأن الاشتراك خلص ..
صرخت مثل الطفل الذي يريد الديد قائلاَ : .. لااااا لااااا . . وجوني يركضون كل هنود المقهى منهبلين يحسبون ماسكني كهرب أو منصرع أو متحرش بي أحد ..
قالوا: ايس موسكل صديق . قلت بسرررررعه بالله اشتراك ساعتين .. بالله بسررررعه .. قعدوا يتحمدون ربهم ويقولون اللهم لك الحمد والشكر .. قلت ماعليه انا مجنون بس واحد منكم يجيب ساعتين يالله .(( خايف تروح نوف، اعنبو بليسه أمداه يحب؟ التيوس وهم تيوس ماحبوا بهالسرعه ))
خذت ساعتين ورجعت للشات ..قلت لهم: معليش عالتأخير لكن جاني اتصال من الوالد يسأل عني يقول ماشفناك ياغالي (( عقدة النقص !! ))
قالت نوف : احلى ياللي مدلعه ابوه .. قلت في نفسي: بلاك والله ماشفتي المفاتيح لا جتني تمشي مليون ثم تنشب في وسط جبهتي .. وعلى فكرة ياشباب ترى الوالد من جد وقيع .. مرة تحداني من عشاء أنه يفلق سن العقل اللي في أقصى حلقي .. وشوي ومادريت الا الحصاة داخله على اثمي ولازخه سن العقل بالمليمتر .. المهم .. دردشت مع نوف عن الدراسه والحياة بشكل عام ..
ومن هالسوالف .. والكلام .. لين جت الساعه 12 الليل .. استاذنت نوف وقالت لي:
نلتقي بكرة ترى اذبحك لو ماجيت هههههههههههه امزح معك ابوســالي ..
قلت في نفسي: مسنتر على هالكرسي لين يجي بكره الله لايعوق بشر !!
رجعت بيتنا وانا اضحك ومبسوط وجحدت سالفة الطلعه من البيت .. اول ماشفت ابوي خذته وحبيت خده .. واناا أضحك ..
قعد يناظرني اخوي الكبير مستغرب .. قلت له خير وش تناظر؟ قال:ليش مبسوط؟ شكلك لاقي كنز ... وش رايك تشتري حمام !!
قلت : اييه ابشر الصباح رباح اقلب وجهك عني الحين.. ورحت غرفتي وتعطرت ولبست بجامة النوم حقتي وخذت الوساده وحضنتها ونمت وانا أهوجس في نوف .(( أما بجامة نوم ذي كثر لي منها اقص يدي انك تنام بثوبك وغترتك ))
--------------------------
(( الـترم الـثـاني إلا ربـع ))
من بكرة أول ماقمت رحت المقهى. دخلت نفس الشات حق أمس .. لقيت نوف موجوده . وصورة اليسا واللون الزهري .. انبسطت ,, تشققت.
وقبل ما أكتب السلام عليكم ,, لقيت الشاشه امتلت بحرف الوااو .. واناظر والقى نوف كاتبه:
ولكمووووووووووووووووووووو ووووووووووووووووووو .
قلت لها: ارحبووووووووووووووووووووو ووووووووووووو
قالت: ابوســالي كيفكووووووووووو (( تعرفون البنات انواع المصول بس مومشكله كنت مبسوط وقتها كني سامع احلى نكته ))
وخذ ياسوالف وهات يا ضحك ومسكنا خط لين 12 الليل.. يوم كامل سواليف شات (( يانصبك نصباه )) المهم لما جت تستأذن وتطلع كتبت لي خاص وبالحرف الواحد :
ابوســالي اربع سنين بالشات ماعمري ارتحت لأحد ..يخرب بيتك وش سويت فيني انت وغيرت هالقاعده ..؟ فمان الله ..
طلعت نوف واناا مذهول مهبوول وصرت كني بهلوول وبأقوم حسيت اني مشللوووووول ..
نوف تبادلني نفس الشعور .. آآآآآه صرخت في المقهى من الفرح . وتجمعوا علي الهنود زي امس ثم تفرقوا وهم يتحمدون ربهم على نعمة العقل !!
استمرت علاقة الشات هذي أكثر من شهر .. كل يوم أجي المقهى وأجلس انا ونوف ضحك وكركرة وكل واحد معجب بالثاني ومخبي حبه خوفاَ من العذال .. صار المقهى هو بيتي وأجلس فيه اكثر من جلستي بالحياة الدنيا
وكل يوم انا ونوف نسوي حزب في الشات ونضحك على هذا ونعلق على ذاك وكالعاده لا جت الساعه 12 تستاذن حبيبتي نوف ثم أصرخ ثم يجون الهنود ثم يتفرقون وهم يتحمدون علي (( هالهنود الظاهر فرحانين لقوا واحد أدلخ منهم 1 )) ,, هههههههه مرة وانا توني داخل المقهى ونوف فيه ماطلعت .. سويت لهم مقلب هالهنود وزعقت وجو يركضون عشان يتحمدون علي قلت : العب عليكم مساكين جريتكم شوفوا نوف موجوده .. لكن الغريب انهم برضو قعدوا يتحمدون علي
-------------------------------------------
في أحد المساءات الشتشتوتيه دعتني الغاليه نوف الى المنتدى حقهم كي أشاهد إبداعاتها وأقيمها لأنها تقول: رأيك يهمني (( قلت لكم خاقه معي )) .. ونقزت من عالم الشات الى عالم المنتديات .. دخلت المنتدى وشفت مشااركاتها وسجلتني معهم. المليعينه واصله وفاكين معها المشرفين تصدقون فعلوني في عصريه . شفت كتاباتها .. الصراحه مليانه مصووووول وساذجه مارجه وتحوم الكبد وأنواع ثقالة الطينه ..
لكن مايمديكم علي لما أرد عليها: انوااااع المجاملات !! . تلقوني رااز مليون ضحكه في الرد لو تشوف ردي من بعيد عليها تحلف بالله داخل شارع تفحيط وانواع الجلنطات !!.. انواع الهاءات والكاكات والخاءات المسدوحه والوجيه التعبيريه اللي أحس أنها تسألني وانا احطها في الرد وتقول: من جدك يا ابو ؟ .. لاا وابشركم تطورت وصرت أضحك كذا: لووووووول بدال الهااءات السابقه (( طيب بشر امك ))
لفت نظري بالمنتدى شيء.. تلقى نوف موضوعها سخيف وماصل بس الردود فوق الميه !! وتلقى الولد يا حبة عيني تعبان في موضوعه ورهيب وصدقي بس الردود تتراوح بين: صفر إلى واحد ..
لا والمشكله مواضيع نوف على بياختها مثبته في المنتدى وأنواع المدح والولد مسكين تلقى موضوعه محذوووف أو إذا سلم من الحذف تلقاه منطول في الماصله .. ألعن ام بليس بعض هالمشرفين يا انهم ذابحتهم اللكاعه (( من تقصد انت بالظبط ؟ شكلك ودك تشوف يوزرك عند باب المنتدى مشيوت ببوز ؟ ))
واقتحمت انا ونوف عالم المسنجر ,, وصرت مدمن مسنجر .. وسواليف تطورت للغزل والعياز بالله (( وجه مصري منافق زالط أم الشنب ))
مرة من المراريت كتبت لي في المسنجر:
أقبل قدميك شوقاَ ليس ذلا .. اركع لك حباَ ليس كفرا.انت حبي سرا وجهرا..حياتي يابوســالي أحبك,,
اخوكم انتقل لرحمة الله مؤقتاَ وغاب عن الوعي ولما رجع له الوعي كتب لها:
بالله ياللي راكب المسروجه.. قل لي على اي المنازل ناوي؟
بالله كانك رايح الفلوجه .. سلم على بومصعب الزرقاوي..
نوف حياتي احبك !! ( ياشيخ ليتك ماعدت للوعي.ياشيخ كل تراب يالسفله لابوك لابو من علمك المغازل ))
صكتني بهالجمله:
اللي يتحداني بغلاك أقبل تحديه.. واللي يشاركني بحبك، من الوجود أفنيه.. حبيبي أغار عليك خلي أسمك ابو نوف بلاش ابوســالي..
قلت في نفسي والله ما تغلبيني في التعبير .. وانا اللي أرقعها بهالبيت:
نوف ياللي حلالة حلاحيل المحاليل حلاله. تحلحلين اللي ماتحلحل عقدها..
نوف بعد عمري قولي لصدام لا يحسبن ان الحرب تجهلنا .. أحبك أحبك ياعمري!(( يالربع وش اسوي هذا اللي اعرفه من الشعر 4 ))
سألتني: تدري حبيبي وش وجه الشبه بيني وبين السمك؟ قلت: كلكم أناث ؟
قالت: لا .. قلت : أجل كلكم كائن حي ؟ قالت: هههههههه لا .. بس هي لو فارقت الماء ماتت .. وانا لو فارقتك اموت !!
قلت: إييييييييييييييييييييه وش اخبار منتداكم ؟ (( يحاول يصرف إجاباته اللي مدري وش تبي ))
مالكم بالطويله..
استمر الغزل واستمرت الاشواق واستمر المسنجر يدهر ,, حتى وقعت الواقعه وحدثت الحادثه التي قصمت ظهر البعير وجعلته يستدير حتى كاد من الصدمةِ أن يطير!!!
(( يتبع في الحلقة القادمه وآسف على الاطاله ))
7
7
7
7
7
7
وش رايكم فيني وانا أسوي لكم تشويق ؟ أعترفوا ماقلتوا: ليييه يابايخ كممممل
(( التـرم الثـانـي )) ---> أبشركم هانت بدينا نخلص ..
في مساءِ ِ مسنجري خااالع .. قالت نوف : وش رايك نجدد علاقتنا بشيء آخر .. قلت مثل إيش؟ قالت: ملينا من الكتابي ولاشواق المكتوبه وش رايك نغير ؟
بيني وبينكم حسيت انها بدت تراودني عن نفسي فاستعصمت ..
قلبي قام يرقع.. ويروس.. وتذكرت ملحق اخوي راعي الطرب هو وربعه لاقاموا يغنون..
قلت: اوكي .. بس كيف؟ قالت: خذ هذا رقمي سوااا .. أبيك تراسلني عليه ونتبادل مسجات ألين يجي الوقت اللي أكلمك أنا .. لاتدق فقط راسلني ..
خزنت رقمها بإسم: الغلاااا .. ومسكنا خط مع المسجات يومين متواصلين ..وسحبنا على المنتديات والشات وهي أصلا تقول ملت من المنتدى وكنسلته خلاص.
بعد فتره جتني منها رساله تطلب مني فيها شحن لأن ظرفها زي ماتقول صعب ولا معها فلوس واهلها مايدرون ان معها بطاقة سوا ..
رحت على بالي كريم وصقعتها بثلاث بطاقات شحن من فئة 100 ريال. ( ياخوي انت رهيب وش رايك تتعرف علي؟ )
وصرنا نتبادل المسجات وكل يومين تطلب مني شحن وتشرح لي ظروفها انها صعبه واهلها مايدرون عن جوالها وان هالمغامره بالجوال كلها عشاني ... قعدت اصيح ورحمتها وقلت ياعمري يانوف.. وصقعتها بشحن بس هالمرة 500 ريال ..
وصرت كل ما أستلم من أبوي فلوس أشحن لها وصرت أصرف على جوالين في وقت واحد .. إليييين زهقت ومليت من الصرف..
شرحت لها في مسج أني خلاص انتهيت وأرهقت ماديا وقلت:
ليت تقدرين ظرفي بعد أنا يالغلاا ..
وقالت: لا أبد عاادي حبيبي .. وطنشتني وسحبت علي كم يوم.. إلين جاء الليل الصاعق ودق جوالي .. مو معقول : الغلااا يتصل بك! ..
زينت فرقة الشعر ورديت بصوت عذب وقلت: الووووووووووو ..
رد علي رجال قال: هلا والله بالكااااش !!
قلت في نفسي: يووووه أبوهاااا الله يستر !! والتزمت الصمت ..
قعد ابوها يضحك وكان حاط المكالمه سبيكر وحوله ناس فاقعين ضحك ..
قال: ماعرفتني ؟ قلت بصوت يرتعد : لاااا
قال: ياخروووووف أنا حبيبتك نوف ههههههه ثم انفجر ضحك هو واللي حوله ..
قلت: وش نوف ما أعرفها .. ( الى الحين يحسب انه ابوها ومسوي ينكر عشان مايوهق الغلااا ))
قال بصوت أجش: يا دلخ ياثور يامهوي .. 4 شهور قاعد أجرجرك وراي بس والله ماشفت أطلق منك .. ياخي ماشاء الله عليك كررريييم ودفييع ومخفه ههههههههههه الظاهر اول مرة تعرف بنت ثم انفجروا ضحك وانا منلخم !!
قال: يالحبيب.. والله رحمتك وجتني ظغوطات من الربع عشان أعترف لك واخليك تعيش حياتك.. لأنهم كل مرة ادردش معك مسنجر او شات يكونون حولي في الاستراحه ونقعد نضحك عليك يا الخروف هههههههههههههه وانفجروا ضحك مرة ثانيه ..
قلت: استاذي انت مين ؟
قال: هههههههههه الى الحين مسوي اسلوب بعد هههههههه ياهووه يا استاذي أروح كشنه معك يا ذوق اسمع وانا اخوك.. انا رجال بعد بكرة عرسي .. وبأتزوج وأعقل .. انا نوف اللي تحبها من شهور .. اللي صرفت عليها فلوسك .. ويكون بعلمك كل شحن عطيته لي تراني أقعد أكلم فيه خطيبتي يعني لاحظ ماخنتك وكلمت غيرك ههههههههههههههههه وانفجر ضحك هو واللي حوله!!
واستمرت اعترافاته وقال: اسمع يالغالي,, خلك حذر مرة ثانيه وعلم ربعك الشباب مهوب كلما شافوا اسم بنت في شات او منتدى قعدوا يطامرون وراه.. وآسف لو لعبت بأعصابك .. بس تبي الصدق؟ يا إنك مخفه عالمي ههههههههههه وانفجروا ضحك وسكر السماعه!!
قمت أدق على الرقم يعطيني مغلق !!
المسنجر حقها أنلغى ولا عاد شفته متصل معي أبد من عقبها !
الشات أدخله ما ألقى نوف الغلا !!
سألت المشرفين في المنتدى قالوا: اختفت ماندري عنهاا
في ألأخير: عرفت أن الأخ كان صادق وانه كان هو الغلااا وكان هو نوف الحلووووة .. قمت اضحك .. اضحك .. اضحك .. ثم عبست براطمي .. وقمت اصيح .. ثم وقفت عن الصياح ورجعت اضحك .. ثم صرت ألعب بأصابعي وامعط شوشتي واضحك واصيح وعلى هالحاله دوااليك (( يخلف الله على عقله. خلاص فلسع ))
دخل علي اخوي الكبير قال وش بك تصيح ؟
قلت: تعباااان ياخوووك.. قال: سلامات؟ قلت: مدري مدري بس حراام اللي صاار لي حرااام .. قال: حمام؟ تبي حمام؟ تشتري؟
قلت: ياشيخ يلعن اللي يردك,, وطلعت معه عند الطيور والحمام..
وقبل لاانسى كان هذا ايميلي
وطبعا أختنا في الله مسويته..
khatay-agLeetek@ HOTMAIL.COM ...

ومن عقبها وانا من الصبح لين العصر عند الحمام ومن العصر لين الليل عند المطرب الشعبي أخوي وأروس له ومن الليل لين الفجر أجلس مع اخوي العاشق والشغاله ..
لا احد يقول لي: خربت وانتكست .. ترى الدشره مع أهلك ولا دشرتن مع واحدن ماتعرف عنه الا يوزره النسائي..
---------------------------------------
مايزتفاد من الغصه.. آآآي:
1- بعض الجروح ان جت من اغراب عادي.. الجرح موت الجرح لا جا من احباب ( ورى ما تاكل تبن بس؟ )
2- وش الفايده لما تمسك لك إنسان ضعيف حبووب وتسحبه على خشته وانت مسوي بنت؟ يعني الشباب ناقصين مساكين؟ فيهم اللي كافيهم اعنبوا أصل أصلكم حسوا يا موقرمين يا اوباش داا زولم وربنا مايحبش الزولم
3- كم واحد بيننا الآن متسحب على خشته ؟
4- أرجو من كل شخص متنكر في زي بنت أن يعترف ويقول انه مذكر وصدقوني ماراح نقول له شيء بالعكس بنقدر له هالبادره (( خايف يتسحب ثانيه ))
5- ارجو من الشباب لا بغوا يسحبون احد على خشته أن يرفقون عليه شوي.. يعني حط اسمك حصه خديجه مهوب لازم اسامي عالميه كـ نوف ريهام وماريا و روز .. وتكفون بلاش صور أليسا ونانسي! يعني بالله وش فيها صورة لطيفه المجرن يعني .. أرحمونا يرحمكم من في السماء.
6- هذه القصه كتبتها على عجل وهي من تأليفي يعني لا أحد يصدق
7- ارجو من الأخت حرفوش انها تعترف انها شنب لأن اسلوبها واضح انه رجالي بحت .. (( هذا مهوب كلامي ولكن استنتاج محشش ))
----------------------------------
همسه حزينه:
لما تروح حلاق هندي ويقعد يحدد لك السكسوكه.. ويقرب من عند خشتك وهو يحدد سكسوكتك ثم يقعد يتنفس في خشتك .. صح وقتها ودك تلعن خامسه؟؟
(( أقص يدي إنها همسة واحد كااااامخ له كمية حشيش وبقوووة ))
جد جد آسف على الاطاله و الى لقاءٍ آخر وكان معكم اخوكم الخبير المقلع
ابو نوف ..
عفوا. ابو ســالي ..
والسلام
ختام
,
,
,
,
,
,
,
,
,
,
,
تشترون حمام (^_^) هههههه
khatay-agLeetek@hotmaiL.com